ევროკომისიამ 2026-2030 წლების „ლგბტქ თანასწორობის სტრატეგია“ დაამტკიცა.

ევროკომისიის განცხადების თანახმად, სტრატეგიის მიზანია ლგბტქ+ ადამიანების დაცვა მავნე პრაქტიკისა და სიძულვილით მოტივირებული დანაშაულებისგან, თანასწორობის ხელშემწყობი ლგბტქ+ თემებისა და ორგანოების გაძლიერება და სამოქალაქო საზოგადოების, ასევე წევრი სახელმწიფოებისა და სხვა აქტორების ჩართულობა.

განცხადების მიხედვით, სტრატეგიის დამტკიცებით, ევროკომისია ადგენს ზომების სერიას, რათა გააძლიეროს ქმედებები, ინტეგრირება გაუწიოს ლგბტქ თანასწორობას ყველა პოლიტიკის სფეროში და ხელი შეუწყოს ლგბტქ უმცირესობების ხმის ამაღლებას, მაგალითად, მავნე პრაქტიკის აღმოფხვრით და სამოქალაქო საზოგადოების ორგანიზაციების დაფინანსებით.

ევროკომისიის განცხადების თანახმადვე, ახალი სტრატეგიის მიზანია 2020-2025 წლების სტრატეგიის ამბიციისა და მიღწევების გათვალისწინება და წარმოადგენს ევროკავშირის ძალისხმევის ნაწილს, რომელიც მიზნად ისახავს ისეთი კავშირის შექმნას, სადაც მრავალფეროვნება კოლექტიური სიმდიდრის ნაწილად იქნება აღიარებული, სადაც ყველა ადამიანს შეუძლია, იყოს საკუთარი თავი დისკრიმინაციის, გარიყულობის ან ძალადობის რისკის გარეშე.

„ჩვენი სოციალური, პოლიტიკური და ეკონომიკური ძალა მრავალფეროვნებაში არსებული ჩვენი ერთიანობიდან მოდის: თანასწორობა და დისკრიმინაციის აკრძალვა ევროკავშირის ძირითადი ღირებულებები და ფუნდამენტური უფლებებია, რომლებიც გათვალისწინებულია მის ხელშეკრულებებსა და ფუნდამენტურ უფლებათა ქარტიაში. ევროკომისიას, პარლამენტს და საბჭოს, წევრ სახელმწიფოებთან ერთად, ყველას ეკისრება პასუხისმგებლობა, დაიცვას ფუნდამენტური უფლებები და უზრუნველყოს ყველასთვის თანაბარი მოპყრობა და თანასწორობა. ბოლო ათწლეულების განმავლობაში, საკანონმდებლო ცვლილებებმა, სასამართლო პრაქტიკამ და პოლიტიკურმა ინიციატივებმა გააუმჯობესა მრავალი ადამიანის ცხოვრება და დაგვეხმარა უფრო თანასწორი და მეგობრული საზოგადოებების შექმნაში, მათ შორის ლესბოსელი, გეი, ბისექსუალი, ტრანსგენდერი, არაბინარული, ინტერსექსი და ქვიარი (LGBTIQ) ადამიანებისთვის. 2015 წელს კომისიამ წარმოადგინა „ლგბტ თანასწორობის ხელშეწყობის ღონისძიებების სია“, პირველი პოლიტიკური ჩარჩო, რომელიც სპეციალურად ლგბტ ადამიანების მიმართ დისკრიმინაციას ებრძვის“, – აღნიშნულია განცხადებაში.

ევროკომისიის განცხადების თანახმად, ევროკავშირი ლგბტქ ადამიანების უფლებების უკეთ დაცვის მცდელობების წინა ხაზზე უნდა იყოს.

„ლგბტქ ადამიანების სოციალური მიმღებლობა ბოლო წლების განმავლობაში ევროკავშირის მასშტაბით სტაბილურად გაიზარდა. ევროკავშირის ფუნდამენტური უფლებების სააგენტოს (FRA) ლგბტქ მესამე კვლევის შედეგები აჩვენებს, რომ ლგბტქ ადამიანები სოციალურ გარემოში უფრო ღიად საუბრობენ საკუთარ სექსუალურ ორიენტაციაზე, გენდერულ იდენტობაზე ან სექსუალურ მახასიათებლებზე. ეს ტენდენცია უფრო აშკარაა ტრანსგენდერ, არაბინარული, გენდერულად მრავალფეროვანი და ინტერსექს რესპონდენტებში. ამავდროულად, FRA-ს კვლევის თანახმად, მნიშვნელოვნად გაიზარდა ლგბტქ ადამიანების მიმართ სიძულვილით მოტივირებული შევიწროების შემთხვევები, რომელთა ნახევარზე მეტმა განაცხადა, რომ მათ მსგავსი გამოცდილება ჰქონდათ. ევროკავშირის ქვეყნების უმეტესობაში რესპონდენტებმა ასევე აღნიშნეს ფიზიკური და სექსუალური თავდასხმების უფრო ხშირი შემთხვევები, განსაკუთრებით ტრანსგენდერ, არაბინარული, გენდერულად მრავალფეროვანი და ინტერსექსი ადამიანების მიმართ. ევროკავშირი ლგბტქ ადამიანების უფლებების უკეთ დაცვის მცდელობების წინა ხაზზე უნდა იყოს. 2020 წლის ნოემბერში კომისიამ მიიღო ლგბტქ თანასწორობის სტრატეგია 2020-2025 წლებში, რომელიც იყო კომისიის პირველი სტრატეგია ლგბტქ თანასწორობის შესახებ და შეასრულა ევროკომისიის ვალდებულება თანასწორობის კავშირის მშენებლობის მიმართ. 2025 წლის ოქტომბერში კომისიამ მიიღო მისი მემკვიდრე სტრატეგია, ლგბტქ+ თანასწორობის სტრატეგია 2026-2030”, – აღნიშნულია განცხადებაში.