საქართველოს განათლების მეცნიერებათა აკადემიამ აკადემიის საპატიო პრეზიდენტის, აკადემიკოს ნათელა ვასაძის 90 წლის იუბილესადმი მიძღვნილი საერთაშორისო სამეცნიერო ონლაინ-კონფერენცია – „უმაღლესი სკოლის პედაგოგიკის თანამედროვე პრობლემები და მათი გადაჭრის გზები“ – გამართა. ამ მნიშვნელოვან სამეცნიერო ფორუმში, რომლის ორგანიზატორები განათლების მეცნიერებათა აკადემია და სოხუმის სახელმწიფო უნივერსიტეტი იყვნენ, მონაწილეობდნენ როგორც საქართველოს, ასევე იტალიის, ესპანეთის, პოლონეთის, ბულგარეთის, რუმინეთის, ყაზახეთის აკადემიური წრეების წარმომადგენლები. პლენარული სხდომა გახსნა და მონაწილეებს მიესალმა საქართველოს განათლების მეცნიერებათა აკადემიის პრეზიდენტი, სოხუმის სახელმწიფო უნივერსიტეტის რექტორი, პროფესორი ზურაბ ხონელიძე. მან ქალბატონ ნათელა ვასაძეს მიულოცა იუბილე და აღნიშნა: „ქალბატონი ნათელა ვასაძის პიროვნებაში ბუნებრივად არის შერწყმული ერთი მხრივ, ხელმძღვანელის პრინციპულობა, მეორე მხრივ – კოლეგიალური გულისხმიერება, ადამიანური სითბო და თანადგომა. ქალბატონი ნათელა კდემამოსილებით, მაღალი ზნეობით, გონიერებით, განსაკუთრებული ორატორული ნიჭით, ჭეშმარიტად ამშვენებს განათლების მეცნიერებათა აკადემიას.“

მონაწილეებს მიესალმა და ქალბატონ ნათელა ვასაძეს იუბილე მიულოცა, საქართველოს განათლების, მეცნიერების, კულტურისა და სპორტის მინისტრის მოადგილემ, პროფესორმა ნუნუ მიცკევიჩმა. კონფერენციაში მონაწილეობდნენ საქართველოს განათლების მეცნიერებათა აკადემიის წევრები და  სოხუმის სახელმწიფო უნივერსიტეტის პროფესორები. ღვაწლმოსილ ქალბატონს ყველამ დიდი სიყვარულით მიულოცა იუბილე. სსუ-ის ყოფილი რექტორი, აკადემიკოსი ოთარ ჟორდანია, მობილურით ჩაერთო კონფერენციაში და ისაუბრა ქალბატონი ნათელას ღვაწლზე. აღსანიშნავია, რომ, წელს საქართველოს განათლების მეცნიერებათა აკადემიის დაარსებიდან, 25 წელი შესრულდა. აკადემიკოსმა ნათელა ვასაძემ თავის გამოსვლაში ისაუბრა განათლების მეცნიერებათა აკადემიის დაარსების პერიპეტიებზე, იმ სამუშაოებსა და ღონისძიებებზე, რომლებიც ამ მეოთხედი საუკუნის მანძილზე ჩაუტარებია აკადემიას. დასასრულ, ქალბატონმა ნათელამ, მონაწილეებს მადლობა გადაუხადა კონფერენციისთვის, ჩატარებული სამუშაოებისთვის.